ବେଲଗୁଣ୍ଠା: ଗତକାଲି ଗାଙ୍ଗପୁର ଥାନା ଅନ୍ତର୍ଗତ ତଥା ଧରାକୋଟ ବ୍ଳକ୍ ପଣିବନ୍ଧ ଗ୍ରାମରେ ଘଟିଥିବା ବୋମାମାଡ଼ ଘଟଣାରେ ଦୁଇ ଅଭିଯୁ୍କ୍ତଙ୍କୁ ଗିରଫ କରିଛି ପୋଲିସ୍ I ଆହତ ଟୁକୁନା ସ୍ଵାଇଁଙ୍କ ସ୍ତ୍ରୀ ସୁନିତା ସ୍ୱାଇଁଙ୍କ ଏତାଲା ପ୍ରକାରେ ପୋଲିସ୍ ଗତକାଲି ଜଣଙ୍କୁ ଅଟକ ରଖିଥିବା ବେଳେ ଆଜି ପଣିବନ୍ଧ ଗ୍ରାମର ଭୋଳା ସ୍ୱାଇଁ ଏବଂ ସନାତନ ବେହେରାଙ୍କୁ ଗିରଫ କରିଛି ଗାଙ୍ଗପୁର ପୋଲିସ୍ I ସୁନିତାଙ୍କ ଏତାଲା ପ୍ରକାରେ ବହୁଦିନ ହେବ ଏନ୍ଆରଜିଏସ୍ ଯୋଜନାର କିଛି ଟଙ୍କା ଭୋଳା ଟୁକୁନା ଠାରୁ ମାଗି ନେଇଥିଲା I କିନ୍ତୁ ଟୁକୁନା ଏହି ଟଙ୍କା ମାଗିବାରୁ ଭୋଳା ବାରମ୍ବାର ଫାଙ୍କିବା ସହ ପୂର୍ବରୁ ମଧ୍ୟ ବୋମାମାଡ଼ କିମ୍ବା ଗୁଳି କରି ଟୁକୁନାକୁ ହତ୍ୟା ଧମକ ମଧ୍ୟ ଦେଇଥିଲା I ଗତକାଲି ଭୋଳା ଏବଂ ସନାତନ ଟୁକୁନାକୁ ଘରୁ ଡାକିନେଇ ପଛପଟୁ ବୋମାମାଡ଼ କରିଥିବା ଅଭିଯୋଗ କରିଛନ୍ତି ସୁନିତା I ସୁନିତାଙ୍କ ଅଭିଯୋଗ ପ୍ରକାରେ ଗାଙ୍ଗପୁର ଥାନାରେ 484/21 ରେ ଏକ ମାମଲା ରୁଜୁକରି ତଦନ୍ତକାରୀ ଅଫିସର୍ ଏସ୍ଆଇ ସୁକାନ୍ତ ପ୍ରଧାନ ଘଟଣାର ତଦନ୍ତ କରିବା ସହ ଦୁଇ ଅଭିଯୁକ୍ତ ଭୋଳା ଏବଂ ସନାତନକୁ ଗିରଫ କରିଥିବା ସୂଚନା ମିଳିଛି I ଆସନ୍ତା କାଲି ଦୁଇ ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ ବୋଲି ଗାଙ୍ଗପୁର ଥାନା ଅଧିକାରୀ ଧୀରେଶ୍ କୁମାର ଦାଶ ପ୍ରକାଶ କରିଛନ୍ତି I ପ୍ରକାଶ ଥାଉକି ଗତକାଲି ସକାଳେ ଏନ୍ଆରଜିଏସ୍ ଏବଂ ପୂର୍ବ ବକେୟା ଟଙ୍କାକୁ କେନ୍ଦ୍ର କରି ପଣିବନ୍ଧ ଗ୍ରାମର ଟୁକୁନା ସ୍ଵାଇଁଙ୍କୁ ସେହି ଗ୍ରାମର ଭୋଳା ସ୍ୱାଇଁ ଏବଂ ସନାତନ ବେହେରା ତାଙ୍କୁ ପଛପଟୁ ବୋମାମାଡ଼ କରିଥିଲେ I ଟୁକୁନା ବର୍ତ୍ତମାନ ବ୍ରହ୍ମପୁର ବଡ଼ ମେଡ଼ିକାଲରେ ଚକିତ୍ସିତ ହେଉଛନ୍ତି I ଗତକାଲି ଟୁକୁନାର ପରିବାର ଲୋକେ ମେଡ଼ିକାଲରେ ଟୁକୁନା ପାଖରେ ଥିବା ଯୋଗୁଁ ଆଜି ଥାନାରେ ଟୁକୁନା ଙ୍କ ସ୍ତ୍ରୀ ସୁନିତା ମେଡ଼ିକାଲ ରୁ ଆସି ଏତାଲା ଦେଇଥିଲେ I ରିପୋର୍ଟ-ଶିବରାମ ଚୌଧୁରୀ
