ବେଗୁନିଆପଡା(ନ୍ୟୁଜଏକ୍ସଟ୍ରା/ଭଞ୍ଜ କିଶୋର ମହାରଣା):କରୋନା ଭାଇରସର ଭୟାଭୟତା ଯୋଗୁଁ ସାରାବିଶ୍ୱ ଏବେ ସଂକଟମୟ ପରିସ୍ଥିତି ଦେଇ ଗତି କରୁଛି l ଏହାର ମୁକାବିଲା ପାଇଁ ସରକାରଙ୍କଠୁ ଆରମ୍ଭ କରି ପ୍ରଶାସନ, ସୁରକ୍ଷା କର୍ମୀ, ସ୍ୱାସ୍ଥ୍ୟ କର୍ମୀ, ଶିକ୍ଷା କର୍ମୀ , ସ୍ବେଛାସେବୀ ଓ ସାଧାରଣ ଜନତା ପର୍ଯ୍ୟନ୍ତ ସମସ୍ତେ ନିଜନିଜର ଭୂମିକା ଗୁରୁତ୍ୱପୂର୍ଣ ମନେକରି କାର୍ଯ୍ୟ ସମ୍ପାଦନ କରିଆସୁଛନ୍ତି l ଆଜିଯାଏଁ ଏହାର କୌଣସି ପ୍ରତିଷେଧକ ଟୀକା ବାହାରି ନଥିବାରୁ ସବୁଠାରୁ ଗୁରୁତ୍ୱପୂର୍ଣ ଦିଗ ହେଉଛି ସମସ୍ତେ ସାମାଜିକ ଦୂରତ୍ୱ ବଜାୟ ରଖିବା l ଏଥିପାଇଁ ପ୍ରତ୍ୟେକ ଗ୍ରାମରେ ସଙ୍ଗରୋଧ ଗୃହ ପ୍ରସ୍ତୁତ କରାଯାଇଛି l କିନ୍ତୁ ସାମ୍ପ୍ରତିକ ପରିବେଶ ଓ ପରିସ୍ଥିତି ଭିନ୍ନ ରୂପ ନେଇଛି l ଅତିମାତ୍ରାରେ ପ୍ରବାସୀ ଶ୍ରମିକଙ୍କ ଆଗମନ ଏବଂ କିଏ କେତେବେଳେ ଓ କେଉଁଥିରେ ଆସୁଛନ୍ତି ଏହାର କୌଣସି ସଠିକ ତଥ୍ୟ ରହୁନି l କିଛିକିଛି ପ୍ରବାସୀ ବାଇକ ଓ ସାଇକେଲରେ ଆସୁଥିବା ବେଳେ କିଛି ପ୍ରବାସୀ ଦୂରଦୁରାନ୍ତରରୁ ଚାଲିଚାଲି ବି ଆସୁଛନ୍ତି l କିଏ କେଉଁଆଡେ ଯାଉଛନ୍ତି ଏହାର କିଛି ଠିକ ଠିକଣା ରହୁନି l ତେଣୁ ଏମାନଙ୍କୁ ସଙ୍ଗରୋଧ ଗୃହକୁ ଟାଣି ଆଣିବାକୁ ପ୍ରଶାସନ ନାକେଦମ ହେଉଥିଲା ବେଳେ ପୁଲିସ ବାହିନୀକୁ ନୟାନ୍ତ ହେବାକୁ ପଡୁଛି l ଏହାସହ ଓଡ଼ିଶାର ବିଭିନ୍ନ ସ୍ଥାନରେ ପ୍ରବାସୀଙ୍କ ରହିବା, ଖାଇବା ନେଇ ପ୍ରବାସୀ ଓ ପ୍ରଶାସନ ମଧ୍ୟରେ ମତାନ୍ତର ଉପୁଜୁଥିବା ବିଭିନ୍ନ ଗଣମାଧ୍ୟମରେ ଦେଖିବାକୁ ମିଳୁଛି l ଏସବୁ ମଧ୍ୟରେ ପୁଲିସର ଦାଇତ୍ୱ କିନ୍ତୁ ବହୁପରିମାଣରେ ବଢିଯାଉଛି l ଯାହାକୁ ସ୍ୱାଗତ କରିଛନ୍ତି ଗଞ୍ଜାମ ଜିଲ୍ଲା କୋଦଳା ଓ ବେଗୁନିଆପଡା ପୁଲିସ l ସବୁ ପ୍ରକାର ପ୍ରତିକୂଳ ପରିସ୍ଥିତିର ଉଚିତ ମୁକାବିଲା କରିବାକୁ କୋଦଳା ଆଇଆଇସି ଦେବାଶିଷ ମହାନ୍ତି ଓ ବେଗୁନିଆପଡା ଫାଣ୍ଡି ଅଧିକାରୀ ଦୀପ୍ତି ରଞ୍ଜନ ବେହେରା ତତ୍ପରତା ପ୍ରକାଶ କରିଛନ୍ତି l ବିଶୃଙ୍ଖଳିତ ପ୍ରବାସୀଙ୍କୁ ଖୋଜି ଖୋଜି ସଙ୍ଗରୋଧକୁ ଆଣିବା, ଚାଲିଚାଲି ଆସୁଥିବା ପ୍ରବାସୀଙ୍କୁ ଥଇଥାନ କରିବା, ରେଳ ଷ୍ଟେସନରୁ ପ୍ରବାସୀଙ୍କୁ ସୁରକ୍ଷିତ ଆଣିବା, ବିଭିନ୍ନ କ୍ୱାରେଣ୍ଟିନ ସେଣ୍ଟର ଏବଂ ଅସ୍ଥାୟୀ ଚିକିତ୍ସା ସେଣ୍ଟର ଆଦି ଭ୍ରମଣ କରିବା ସହ ସାଧାରଣରେ ନିୟମ ଭଙ୍ଗ କରୁଥିବା ଅମାନିଆଙ୍କୁ ସାବାଡ଼ କରିବା ସହ ଆଇନ ଶୃଙ୍ଖଳା ବଜାୟ ରଖିବା ଭଳି ବଡ ଦାଇତ୍ୱ ନିର୍ବାହ କରୁଛନ୍ତି କୋଦଳା ଓ ବେଗୁନିଆପଡା ପୁଲିସ l ନିକଟରେ ଗଞ୍ଜାମ ଏସପି ଉକ୍ତ ଦୁଇ ଥାନାକୁ ଚାରିଗୋଟି ଗାଡି ପ୍ରଦାନ କରିଥିବା ଜଣାପଡିଛି l ଏହି ଦୁଇ ଥାନା ଲିମିଟସ ରେ 60 ଗୋଟି ସଙ୍ଗରୋଧ ଗୃହରେ ଚାରି ହଜାରରୁ ଅଧିକ ପ୍ରବାସୀ ଅଛନ୍ତି l ଏହାସହ ପ୍ରତିଦିନ ଏମାନଙ୍କ ସଂଖ୍ୟା ବଢ଼ିବାରେ ଲାଗିଛି l ଏହାକୁ ଦୃଷ୍ଟିରେ ରଖି ଉଭୟ କୋଦଳା ଓ ବେଗୁନିଆପଡା ପୁଲିସ ସକାଳ 7 ଘଣ୍ଟରୁ ଅପରାହ୍ନ 2 ଘଣ୍ଟ ଏବଂ ଅପରାହ୍ନ 3 ଘଣ୍ଟରୁ ରାତ୍ର 12 ଘଣ୍ଟ ଯାଏଁ ପେଟ୍ରୋଲିଙ୍ଗ କରିବା ଦେଖାଯାଉଛି l ଯାହାକି ଜନସାଧାରଣଙ୍କୁ ଆଶ୍ୱସ୍ତ କରିଛି l
