ବ୍ରହ୍ମପୁର(ନ୍ୟୁଜଏକ୍ସଟ୍ରା ବ୍ୟୁରୋ):ଗଂଜାମ ଜିଲା ବ୍ରହ୍ମପୁରର ବିଭିନ୍ନ ଅଙ୍ଗନବାଡିରେ ଶିଶୁ ଓ ଗର୍ଭବତୀଙ୍କୁ ରାନ୍ଧି ଦିଆଯାଉଥିବା ଅଣ୍ଡା ବଣ୍ଟନ ଦାୟୀତ୍ୱ ନେବେ ମହିଳା ସ୍ୱୟଂ ସହାୟିକା ଗୋଷ୍ଠୀ। ଯାହାକୁ ବିରୋଧ କରିଛନ୍ତି ଆସ୍କା ରୋଡ଼ ୨ ଅନ୍ତର୍ଗତ ଆଲ ଓଡିଶା ଲେଡିସ ୱାର୍କର ଆସୋସିଏସନ। ଏନେଇ ଏକ ଦାବି ପତ୍ର ଲେଖି ଜିଲା ପ୍ରଶାସନ ଓ ଶିଶୁ ମଙ୍ଗଳ ଅଧିକାରୀଙ୍କୁ ଜଣାଇ ଦେଇଛନ୍ତି।ସେମାନଙ୍କ ଅଭିଯୋଗ ହେଲା, ଆଜି ଯାଏଁ ସେମାନେ ଗରମ ରନ୍ଧନ ଖାଦ୍ୟ, ଶିଶୁ ଓ ଗର୍ଭବତୀଙ୍କ ନିମନ୍ତେ ଆବଶ୍ୟକ ହେଉଥିବା ଅଣ୍ଡାକୁ ସେମାନେ ଯୋଗାଇ ଆସୁଥିଲେ। ଏହି ସମସ୍ତ ଅଣ୍ଡା ଯାଞ୍ଚ କମିଟି ଓ ମାତୃ କମିଟି ଦ୍ୱାରା ଯାଞ୍ଚ କରି ପ୍ରଦାନ ହେଉଥିଲା। ଅଣ୍ଡା ବାବଦ ଅର୍ଥ ସ୍ଥାନୀୟ କର୍ପୋରେଟର ଓ ଅଙ୍ଗନବାଡ଼ିଙ୍କ ଦ୍ଵାରା ହୋଇଥିବା ଯୁଗ୍ମ ପାସ ବୁକ ମାଧ୍ୟମରେ ପ୍ରଦାନ କରାଯାଉଥିଲା। ଏ ଯାଏଁ ଏଥିରେ କୌଣସି ଅସୁବିଧା ହେଉ ନ ଥିଲା। ହଠାତ ଗତ 9 ତାରିଖରେ ଜିଲା ପ୍ରଶାସନ ପକ୍ଷରୁ ଏହା ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କ ହାତରେ ଦିଆଯାଇଛି। ଯାହାକୁ ନେଇ ଅସନ୍ତୁଷ୍ଟ ପ୍ରକାଶ କରିଛନ୍ତି ଅଙ୍ଗନବାଡି କର୍ମୀ ମାନେ। ଏଣୁ ପୂର୍ବରୁ ଯେଉଁଭଳି ଚାଲିଥିଲା ସେଭଳି ଚାଲିବାକୁ ଅନୁରୋଧ କରିଛନ୍ତି ଅଙ୍ଗନବାଡି କର୍ମୀ ମାନେ।
