ଖଲ୍ଲିକୋଟ (ନ୍ୟୁଜଏକ୍ସଟ୍ରା/ପ୍ରଦୀପ୍ତ କୁମାର ସାହୁ) : ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ଅଞ୍ଚଳରେ ଦିନକୁ ଦିନ ଦାଦନ ସମସ୍ୟା ଉତ୍କଟ ହେଉଥିବା ବେଳେ ପ୍ରତିଦିନ ବେକାର ଯୁବକ ଯୁବତି ମାନେ କାମଧନ୍ଦା ଅନ୍ବେଷଣରେ ରାଜ୍ୟ ବାହାରକୁ ଯାଇ ନିର୍ଯ୍ୟାତନାର ଶିକାର ହେବା ସହ ମୃତ୍ୟୁ ମୁଖରେ ପଡ଼ିଥିବା ଦେଖିବାକୁ ମିଳିଛି । ଗତ ଏକବର୍ଷ ଦଶମାସ ପୂର୍ବରୁ ଖଲ୍ଲିକୋଟ ଥାନା ଅନ୍ତର୍ଗତ ବାଣିଆ
ଗ୍ରାମ ପଞ୍ଚାୟତର ବାଣିଆ ଗ୍ରାମର ବିଜୟ ଗୌଡ଼ଙ୍କ ପୁଅ ପ୍ରତାପ ଗୌଡ଼ ଗତ ଏକବର୍ଷ ଦଶମାସ ତଳେ ରୋଜଗାର କରିବା ପାଇଁ ସୁଦୂର ମାଲେସିଆ ଯାଇଥିଲେ । ସଂମ୍ପର୍କିୟଙ୍କ କହିବାନୁଯାୟୀ ଗତକାଲି ଫୋନ ଯୋଗେ ପ୍ରତାପଙ୍କ ସହ ମିଶି ରହୁଥିବା ଚିକିଟି ଅଂଚଳର ଜଣେ ଶ୍ରମିକଙ୍କ ସୂଚନା ପ୍ରକାରେ ପ୍ରତାପଙ୍କ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ ପରିବାର ଲୋକେ । ଗତ କାଲି ମଙ୍ଗଳବାର ଦିନ ସେଠାରେ ମୃତ୍ୟୁ ବରଣ କରିଥିବା ଜଣାପଡ଼ିଛି । ମୃତ୍ୟୁ ଖବର ସ୍ତ୍ରୀ ଗୀତା ଗୌଡ଼ ଜାଣିବାପରେ ଗୀତାଙ୍କର ପାଦତଳୁ ମାଟି ଖସିଯାଇଛି । ଘଡ଼ିକ ପରେ ଘଡ଼ିକେ ଅଚେତ୍ ହୋଇପଡ଼ୁଛନ୍ତି ଗୀତା। ଏପଟେ ବଞ୍ଚିଥାଉ ଥାଉ ରୋଜଗାରିଆ ପୁଅର ମୃତ୍ୟୁ ଖବର ଶୁଣି ବାହୁନି ବାହୁନି କାନ୍ଦୁଛି ବୃଦ୍ଧା ମା ଗନ୍ଧିଆଣି । ପ୍ରତାପଙ୍କ ବଡ଼ପୁଅ ବାନାମ୍ବର ନବମ ଶ୍ରେଣୀରେ ପଢୁଥିବାବେଳେ ବଡଝିଅ ମାମୁନି ପଞ୍ଚମ ଶ୍ରେଣୀରେ ଓ ସାନଝିଅ କାମିନୀ ଦ୍ୱିତୀୟ ଶ୍ରେଣୀରେ ପଢୁଛନ୍ତି । ବାପ ଛେଉଣ୍ଡ ହୋଇଗଲେ ତିନି ପୁଅଝିଅ । ପିଲାମାନେ ବାପାଙ୍କ ଫେରିବା ବାଟକୁ ଚାହିଁ ରହିଛନ୍ତି । କେବେ ଆସିବେ ଆମ ବାପା । ମରଶରୀର କୁ ନିଜ ଗ୍ରାମକୁ ଆଣିବା ପାଇଁ ସରକାରଙ୍କ ନିକଟରେ ନିବେଦନ କରିଛନ୍ତି ପରିବାର ଲୋକେ । ମୃତ ପରିବାରଙ୍କ ଘରକୁ ଛତ୍ରପୁର ଗ୍ରାମ ଶ୍ରମନିରୀକ୍ଷକ ବି, ହୃଷିକେଶ ରାଓ ପହଂଚି ସମବେଦନା ଜଣାଇବାସହ ଅତି ଶୀଘ୍ର ପ୍ରତାପଙ୍କ ମରଶରୀର ଆଣିବାପାଇଁ ପ୍ରତିଶ୍ରୁତି ଦେଇଥିବା ଜଣାପଡ଼ିଛି । ସେହିପରି ଏହି ଖଲ୍ଲିକୋଟ ବ୍ଲକ ର ନାଇକାଣି ପଲ୍ଲି ଗ୍ରାମର ମୁରଲି ସ୍ବାଇଁ ଦୀର୍ଘ ଅଢେଇବର୍ଷ ହେଲା ଶ୍ରମିକ ଭାବରେ ଶ୍ରମିକ ଦଲାଲଙ୍କ ଜରିଆରେ ସୁଦୂର କେରଳକୁ ଠିକା ଶ୍ରମିକ ଭାବରେ ଯାଇଥିଲେ । ସେଠାରେ ଆଜି କୌଣସି କାରଣରୁ ମୃତ୍ୟୁ ହୋଇଥିବା ଖବର ପାଇଥିଲେ ସ୍ତ୍ରୀ ଶିଶୁଳା । ପାଖରେ ଏବେ କେହି ନାହାନ୍ତି । କିଛିବର୍ଷ ତଳେ ଝିଅ ସନ୍ତୋଷୀ ର ବାହାଘର ହୋଇଥିଲା, ବାହାଘରର ବାକି ସୁଝି ବା ପାଇଁ ଦଲାଲଙ୍କ ପ୍ରରୋଚନାରେ କେରଳକୁ ଯାଇଥିଲେ ମୁରଲି । ମୁରଲିଙ୍କ ମର ଶରୀର କୁ କେରଳ ରୁ ଫେରାଇ ଆଣିବାକୁ ପରିବାର ସହିତ ଗ୍ରାମବାସୀ ସରକାର କୁ ଆକୁଳ ନିବେଦନ କରିଛନ୍ତି।